Sariputta | Paritta | Dhajagga Sutta Sariputta

Dhajagga Sutta


Yassānussaraṇenāpi,
antalikkhepi pāṇino;
Patiṭṭhamadhigacchanti,
bhūmiyaṃ viya sabbathā.

Sabbupaddavajālamhā,
yakkhacorā disambhavā;
Gaṇanā na ca muttānaṃ,
parittaṃ taṃ bhaṇāma he.

Evaṃ me sutaṃ:
ekaṃ samayaṃ Bhagavā Sāvatthiyaṃ viharati
Jetavane Anāthapiṇḍikassa ārāme.

Tatra kho Bhagavā bhikkhu āmantesi “Bhikkhavo” ti.
“Bhadante” ti te bhikkhū Bhagavato paccassosuṃ.
Bhagavā etadavoca:
Bhūtapubbaṃ bhikkhave devāsura saṅgāmo samupabyūḷho ahosi.
Atha kho bhikkhave Sakko devānamindo deve Tāvatiṃse āmantesi,
“Sace mārisā devānaṃ saṅgāmagatānaṃ uppajjeyya bhayaṃ vā
chambhitattaṃ vā lomahaṃso vā mameva tasmiṃ samaye
dhajaggaṃ ullokeyyātha;
mamaṃ hi vo dhajaggaṃ ullokayataṃ yaṃ bhavissati bhayaṃ vā
chambhitattaṃ vā lomahaṃso vā, so pahīyissati.

No ce me dhajaggaṃ ullokeyyātha,
atha Pajāpatissa devarājassa dhajaggaṃ ollokeyyātha.
Pajāpatissa hi vo devarājassa
dhajaggaṃ ullokayataṃ
yaṃ bhavissati bhayaṃ vā chambhitattaṃ vā,
lomahaṃso vā, so pahīyissati.

No ce Pajāpatissa devarājassa dhajaggaṃ ullokeyyātha,
atha Varuṇassa devarājassa dhajaggaṃ ullokeyyātha;
Varuṇassa hi vo devarājassa dhajaggaṃ ullokayataṃ
yaṃ bhavissati bhayaṃ vā chambhitattaṃ vā
lomahaṃso vā, so pahīyissati.

No ce Varuṇassa devarājassa dhajaggaṃ ullokeyyātha
atha Īsānassa devarājassa dhajaggaṃ ullokeyyātha;
Īsānassa hi vo devarājassa dhajaggaṃ ullokayataṃ
yaṃ bhavissati bhayaṃ vā chambhitattaṃ vā
lomahaṃso vā, so pahīyissati.

Taṃ kho pana bhikkhave Sakkassa vā devānamindassa
dhajaggaṃ ullokayataṃ, Pajāpatissa vā devarājassa dhajaggaṃ
ullokayataṃ, Varuṇassa vā devarājassa dhajaggaṃ ullokayataṃ,
Īsānassa vā devarājassa dhajaggaṃ ullokayataṃ,
yaṃ bhavissati bhayaṃ vā chambhitattaṃ vā lomahaṃso vā,
so pahīyethāpi nopi pahīyetha.

Taṃ kissa hetu
Sakko hi bhikkhave devānamindo avītarāgo avītadoso
avītamoho bhīrū chambhī utrāsī palāyīti.

Ahañca kho bhikkhave evaṃ vadāmi
sace tumhākaṃ bhikkhave araññagatānaṃ vā
rukkhamūlagatānaṃ vā suññāgāragatānaṃ vā
uppajjeya bhayaṃ vā chambhitattaṃ vā lomahaṃso vā
mameva tasmiṃ samaye anusareyyātha.

“Itipi so Bhagavā arahaṃ, sammāsambuddho,
vijjācaraṇasampanno, sugato, lokavidū,
anuttaro purisadammasārathi, satthā devamanussānaṃ,
buddho, bhagavā”ti.

Mamaṃ hi vo bhikkhave anussarataṃ
yaṃ bhavissati bhayaṃ vā chambhitattaṃ vā
lomahaṃso vā, so pahīyissati.

No ce maṃ anussareyātha,
atha Dhammaṃ anussareyyātha

“Svākkhāto bhagavatā dhammo sandiṭṭhiko akāliko
ehipassiko opaneyyiko paccattaṃ veditabbo viññūhī”ti.

Dhamma hi vo bhikkhave anussarataṃ
yaṃ bhavissati bhayaṃ vā chambhitattaṃ vā
lomahaṃso vā, so pahīyissati.

No ce Dhammaṃ anussareyyātha,
atha Saṅghaṃ anussareyyātha:

Suppaṭipanno bhagavato sāvakasaṅgho,
ujuppaṭipanno bhagavato sāvakasaṅgho,
ñāyappaṭipanno bhagavato sāvakasaṅgho,
sāmīcippaṭipanno bhagavato sāvakasaṅgho,
yadidaṃ cattāri purisayugāni aṭṭha purisapuggalā,
esa bhagavato sāvakasaṅgho, āhuneyyo, pāhuneyyo,
dakkhineyyo, añjalikaraṇīyo, anuttaraṃ puññakkhettaṃ lokassā”ti.

Saṅghaṃ hi vo bhikkhave anussarataṃ yaṃ bhavissati bhayaṃ vā
chambhitattaṃ vā lomahaṃso vā, so pahīyissati.

Taṃ kissa hetu
Tathāgato hi bhikkhave arahaṃ sammāsambuddho vītarāgo
vītadoso vītamoho abhīrū achambhi anutrāsī apalāyīti.

Idamavoca Bhagavā,
idaṃ vatvāna Sugato athāparaṃ etadavoca satthā:

Araññe rukkhamūle vā suññāgāre vā bhikkhavo.
anussaretha sambuddhaṃ bhayaṃ tumhāka no siyā.

No ce Buddhaṃ sareyyātha,
lokajeṭṭhaṃ narāsabhaṃ;
Atha Dhammaṃ sareyyātha,
puññakkhettaṃ anuttaraṃ.

No ce Dhammaṃ sareyyātha,
niyyānikaṃ sudesitaṃ;
Atha Saṅghaṃ sareyātha,
puññakkhettaṃ anuttaraṃ.

Evaṃ Buddhaṃ sarantānaṃ,
Dhammaṃ Saṅghañca bhikkhavo;
Bhayaṃ vā chambhitattaṃ vā,
lomahaṃso na hessati.
Kritik dan Saran, Hubungi : cs@sariputta.com