Mangala Sutta

Yam mangalam dvādasahi, cintayimsu sadevakā; sotthānam nādhigacchanti, atthattimsañca mangalam. Desitam devadevena, sabba pāpa vināsanam; sabba loka hitatthāya, mangalam tam bhanāma he.

Evam-me sutam:

Ekam samayam Bhagavā, Sāvatthiyam viharati, Jetavane Anāthapiṇḍikassa, ārāme.

Atha kho aññatarā devatā, abhikkantāya rattiyā abhikkanta-vaṇṇā kevala-kappam Jetavanam obhāsetva. Yena Bhagavā tenupasankami,

upasankamitvā Bhagavantam abhivādetvā ekamantam aṭṭhāsi. Ekam-antam ṭhitā kho sā devatā Bhagavantam gāthāya ajjhabhāsi:

“Bahū devā manussā ca mangalāni acintayum Ākankhamānā sotthānam brūhi mangalam-uttamam.”

“Asevanā ca bālānam paṇḍitānañca sevanā Pūjā ca pūjanīyānam etam-mangalam-uttamam.

Paṭirūpa-desa-vāso ca pubbe ca kata-puññatā Atta-sammā-paṇidhi ca etam-mangalam-uttamam.

Bāhu-saccañca sippañca vinayo ca susikkhito Subhāsitā ca yā vācā etam-mangalam-uttamam.

Mātā-pitu-upaṭṭhānam putta-dārassa sangaho Anākulā ca kammantā etam-mangalam-uttamam.

Dānañca Dhamma-cariyā ca ñātakānañca sangaho Anavajjāni kammāni etam-mangalam-uttamam.

Āratī viratī pāpā majja-pānā ca saññamo Appamādo ca dhammesu etam-mangalam-uttamam.

Gāravo ca nivāto ca santuṭṭhī ca kataññutā Kālena dhammassavanam etam-mangalam-uttamam.

Khantī ca sovacassatā samaṇānañca dassanam Kālena Dhamma-sākacchā etam-mangalam-uttamam.

Tapo ca brahma-cariyañca ariya-saccāna-dassanam Nibbāna-sacchi-kiriyā ca etam-mangalam-uttamam.

Phuṭṭhassa loka-dhammehi cittam yassa na kampati Asokam virajam khemam etam-mangalam-uttamam.

Etādisāni katvāna sabbattham-aparājitā Sabbattha sotthim gacchanti tan-tesam mangalam-uttaman'ti.”