PUPPHA VAGGA


44 )

Ko imaṃ pathaviṃ vicessati yamalokaṃ ca imaṃ sadevakaṃ ko dhammapadaṃ sudesitaṃ kusalo puppham iva pacessati

baca cerita

45 )

Sekho pathaviṃ vicessati yamalokaṃ ca imaṃ sadevakaṃ sekho dhammapadaṃ sudesitaṃ kusalo puppham iva pacessati

baca cerita

46 )

Pheṇūpamaṃ kāyam imaṃ viditvāmarīcidhammaṃ abhisambudhāno chetvāna mārassa papupphakāni adassanaṃ maccurājassa gacche

baca cerita

47 )

Pupphāni heva pacinantaṃ byāsattamanasaṃ naraṃ suttaṃ gāmaṃ mahogho va maccu ādāya gacchati

baca cerita

48 )

Pupphāni heva pacinantaṃ byāsattamanasaṃ naraṃ atittañ eva kāmesu antako kurute vasaṃ

baca cerita

49 )

Yathā pi bhamaro pupphaṃ vaṇṇagandhaṃ aheṭhayaṃ paleti rasam ādāya evaṃ gāme munī care

baca cerita

50 )

Na paresaṃ vilomāni na paresaṃ katākataṃ attano va avekkheyya katāni akatāni ca

baca cerita

51 )

Yathā pi ruciraṃ pupphaṃ vaṇṇavantaṃ agandhakaṃ evaṃ subhāsitā vācā aphalā hoti akubbato

baca cerita

52 )

Yathā pi ruciraṃ pupphaṃ vaṇṇavantaṃ sagandhakaṃ evaṃ subhāsitā vācā saphalā hoti sakubbato

baca cerita

53 )

Yathā pi puppharāsimhā kāyirā mālāguṇe bahū evaṃ jātena maccena kattabbaṃ kusalaṃ bahuṃ

baca cerita

54 )

Na pupphagandho paṭivātam eti na candanaṃ tagaramallikā vā sataṃ ca gandho paṭivātam eti sabbā disā sappuriso pavāyati

baca cerita

55 )

Candanaṃ tagaraṃ vā pi uppalaṃ atha vassikī etesaṃ gandhajātānaṃ sīlagandho anuttaro

baca cerita

56 )

Appamatto ayaṃ gandho yāyaṃ tagaracandanī yo ca sīlavataṃ gandho vāti devesu uttamo

baca cerita

57 )

Tesaṃ sampannasīlānaṃ appamādavihārinaṃ sammadaññāvimuttānaṃ māro maggaṃ na vindati

baca cerita

58 )

Yathā saṅkāradhānasmiṃ ujjhitasmiṃ mahāpathe padumaṃ tattha jāyetha sucigandhaṃ manoramaṃ

baca cerita

59 )

Evaṃ saṅkārabhūtesu andhabhūte puthujjane atirocati paññāya sammāsambuddhasāvako

baca cerita